Një skandal i madh ka ndodhur dje pas përfundimit të ndeshjes së futbollit mes Mlladost dhe Tërnocit në qytetin e Bosilegradit në Serbi.
Klubi shqiptar njoftoi se pas përfundimit të duelit, Policia serbe sulmoi futbollistin Veton Zeqiri, e më pas kishte trajtim jo-njerëzor në zhveshtore, duke i kontrolluar të gjithë.
Akteri kryesor, Veton Zeqiri në një prononcim ekskluziv për mediumin tonë ka zbuluar se si është goditur nga një polic serb, e si ndodhi gjithçka dje në Bosilegrad të Serbisë.
“Po, unë isha protagonisti kryesor i ndeshjes, që Polici më sulmoi në mënyrë jo-njerëzore, kjo ndodhi sepse lojtarët kundërshtarë na sulmuan fillimisht dhe pastaj Policia hyri në fushë. Unë isha lojtari i parë që e ndalova Policin ta pyes pse po futet në fushë dhe ai pa menduar dy herë më goditi në fytyrë dhe tentoi përsëri të më godasë, por kur e pa që ishte duke u filmuar nga kamera, ndaloi dhe iku nga stadiumi”, tha fillimisht Veton Zeqiri për ‘GazetaBlic Sport’.
Zeqiri thotë se do ankohet në organet kompetente, teksa falënderon shqiptarët që e përkrah atë dhe klubin e Tërnocit pas këtij skandali.
“Pastaj në mënyrë jo njerëzore na futën në zhveshtore, na kontrolluan sikur të ishim huliganë, sepse kemi ardhur kinse të bëjmë probleme. Unë kam lëndime në sy, isha tek mjeku, jam duke pritur të ankohen në organet e shtetit. Faleminderit të gjithëve nga Kosova e Shqipëria që po na mbështesin neve si ekip“, përfundoi ai.
