Zvicra të shtunën do të përballet me Serbinë në Ligën e Kombeve. Pas dueleve në Botërorin 2018 dhe 2022, sytë janë te kapiteni zviceran, Granit Xhaka.
Vëllai i tij, Taulant Xhaka, i cili përfaqësoi Shqipërinë përgjatë karrierës së tij me kombëtare, tha për të përditshmen zvicerane ‘Blick’ se i kishte sugjeruar Granit Xhakës të mos luante me Serbinë, përcjell Insajderi.
“I sugjerova Granitit që të fliste me trajnerin Murat Yakin dhe ndoshta ta kalonte këtë lojë, por të gjithë e njohim vëllanë tim, ai dëshiron të luajë çdo ndeshje për Zvicrën”, tha Xhaka.
33-vjeçari kryesisht shpreson që të mos jetë ndeshje emocionale dhe kaotike si në duelet e mëparshme.
“Nuk është e lehtë të mbash veten nën kontroll për 90 minuta kur gjërat bëhen emocionale. Graniti duhet të qëndrojë i qetë, të luajë futboll, të fitojë dhe të injorojë provokimet. Është e lehtë të thuhet, por në fund gjithçka ka të bëjë me këtë: të luash lojë futbolli dhe të fitosh”.
“Nuk duam të merremi më me gjëra që kanë pak lidhje me futbollin”, shtoi ndër të tjera ai.
