Kryeministri populist i Sllovakisë, Robert Fico, ka reaguar ndaj një plani të ri të Bashkimit Evropian që synon të ndalojë importet e gazit natyror rus deri në fund të vitit 2027, për të ndërprerë të ardhurat që financojnë luftën e Vladimir Putinit në Ukrainë.
Plani pritet të prezantohet muajin e ardhshëm nga Komisioni Evropian, i cili synon të ndalojë kontratat e reja për gaz me Rusinë që nga fundi i këtij viti dhe të heqë gradualisht ato ekzistuese në 27 vendet anëtare deri në vitin 2027.
Por, për Sllovakinë kjo është e papranueshme.
“Plani është absolutisht i papranueshëm për Sllovakinë,” ka deklaruar Fico, duke paralajmëruar se do të përdorë veton për ta ndaluar.
Ai tha gjithashtu se të gjithë përfaqësuesit sllovakë në BE do të punojnë për ta bllokuar këtë iniciativë.
Sipas tij, masa e propozuar do të ketë pasoja të rënda ekonomike.
“Kjo lëvizje do të ishte e dëmshme për Sllovakinë dhe të gjithë BE-në, sepse çmimi i gazit do të rritet si rezultat”, ka shtuar ai.
Sllovakia aktualisht ka një marrëveshje për furnizim me gaz rus që skadon në vitin 2034, dhe Fico paralajmëron se nëse plani vazhdon, vendi i tij do të kërkojë kompensim për dëmet.
Ai hodhi poshtë gjithashtu propozimet për ndalimin e importeve të naftës dhe karburantit bërthamor nga Rusia në BE, duke u pozicionuar hapur kundër sanksioneve të mëtejshme ndaj Moskës.
