Ushqimet dhe gatimi sigurisht e kanë vendin në kuzhinë.
Në çdo shtëpi ka një mjedis të posaçëm për ruajtjen e tyre, në raftet e bufesë apo brenda në frigorifer. Konservimi i duhur i ushqimeve është pjesë e vlerave dhe shijes që ato i dhurojnë më pas trupit.
Ndonëse mund të keni njohuri të përgjithshme mbi këtë temë, ekspertët e sigurisë ushqimore tregojnë disa truke të vogla që ju ndihmojnë në ruajtjen më të mirë të ushqimeve.
Kur flasim për ushqimet, frutat dhe perimet janë gjithnjë më delikatet dhe ato që prishen më shpejt.
Sekreti qëndron që të mos t’i ruani ato kurrë bashkë me njëra tjetrën në një vend. Kjo pasi një gaz i veçantë që disa perime dhe fruta lëshojnë mund t’i prishë ato para kohe.
Çfarë i prish perimet
Etileni është një gaz që frutat dhe perimet lëshojnë zakonisht pasi janë këputur nga pema ose kërcelli ku rriten.
Megjithëse konsiderohet si gaz, etileni është tërësisht natyral dhe vetëprodhohet nga bimët.
Prandaj deri këtu nuk ka asgjë për t’u shqetësuar, pasi nuk shkakton asnjë efekt anësor në organizëm.
Ajo çfarë prek janë vetëm perimet apo frutat, të cilat fillojnë e humbasin shijen e tyre të freskët kur ky gaz lëshohet nga perime të tjera.
Jo të gjithë perimet apo frutat e përmbajnë me shumicë këtë gaz, por disa prej tyre janë shumë të pasura me të.
Në këtë artikull AgroWeb.org ju tregon se cilat janë këto ushqime në mënyrë që të mos t’i ruani asnjëherë afër.
Mollët
Ndër frutat më të pasura me këtë lloj gazi, mollët duhet të ruhen gjithnjë larg fruta perimeve të tjera.
Nëse nuk doni që ato të prishen dhe zbuten, mundohuni t’i ruani në një vend të veçantë.
Qoftë në frigorifer apo në një enë të bukur në qendër të tavolinës tuaj.