Pronari i kompanisë “SpaceX”’, Elon Musk, ka njoftuar se interneti i Starlinkut tashmë është i qasshëm në Kosovë.
Për qasjen e Kosovës në internetin e Starlink ka njoftuar edhe vet kompania, përmes një njoftimi në platformën “X”.
“Starlink tani në Kosovë”, shkroi Musk, teksa vetë kompania tha se “interneti me shpejtësi të lartë Starlink tani është i disponueshëm në Kosovë”.
Kjo kompani ofron internet satelitor në mbi 100 shtete, me rreth 6 mijë satelitë,që gjenden rreth 500 kilometra mbi Tokë. Internet pa ndërprerje, në çdo cep të territorit, edhe në situata të jashtëzakonshme, me shpejtësi 120 deri në 250 megabit për sekondë (mbps).
Si funksionon?
Porositjen e shërbimeve mund ta bëjë secili në faqen e Starlink-ut, duke kërkuar adresën më të afërt.
Pas porosisë, Starlink-u do t’ia dërgojë klientit pajisjen marrëse, e cila lidhet me satelitët në hapësirë. Kjo pajisje mund të përdoret në lokacione të ndryshme, si për shembull në mal, në terrene të vështira, e vende të tjera ku nuk ka qasje të mirë në internet.
Anëtarja e bordit të ARKEP-it, Rrezarta Duraku Rizaj, për REL ka deklaruar se: Autorizimi i Starlink-ut ka më së shumti impakt në rritjen e sigurisë nacionale, sidomos në periudhë konfliktesh. Kjo, për faktin se pjesa dërrmuese e infrastrukturës së Starlink-ut gjendet në hapësirë dhe është e paprekshme nga dëmtimet e mundshme në kohë lufte apo katastrofash natyrore në Tokë. Një terminal i Starlink-ut ka në të njëjtin moment pamje në disa satelitë në hapësirë, me çka rritet edhe më shumë disponueshmëria e shërbimit.
Sipas saj, kjo përparësi mund të shfrytëzohet nga bizneset dhe nga institucionet qeveritare, sidomos ato të sigurisë, të cilat menaxhojnë infrastrukturë kritike.
Ndërkaq sa i përket shpejtësisë, Starlink-u nuk iu bën konkurrencë operatorëve lokalë, por është plan i mirë rezervë, në rast të dështimit të linjave tokësore.
Nami i Starlink-ut në Ukrainë
Starlink-u pati marrë gjithë vëmendjen në shkurt të vitit 2022, kur Rusia nisi luftën në Ukrainë, dhe për pasojë ukrainasve iu shkëputen linjat e internetit.
Vendimi i Muskut për të mbuluar Ukrainën me internet ishte konsideruar jetik për shumë operacione të ushtrisë ukrainase, por edhe për rimëkëmbje të infrastrukturës së energjisë dhe komunikimit.
Starlink-u ka bërë të ditur se po punon edhe për ofrimin e shërbimeve telefonike – por, deri atëherë, të gjithë sytë tek interneti!
