Një sasi e llojeve të ndryshme të produkteve farmaceutike është gjetur sot nga Policia e Kosovës në një depo pranë stacionit të autobusëve në pjesën veriore të Mitrovicës.
Siç ka konfirmuar për gazetën online Reporteri.net, zëvendëskomandanti i Policisë së Kosovës për rajonin e veriut, Veton Elshani, përveç policisë, në vendngjarje tashmë është edhe dogana e Kosovës.
Elshani ka thënë se nuk dihet origjina e produkteve medicinale të gjetura në këtë depo.
“Pas pranimit të informacioneve se në një depo/magazinë në afërsi të stacionit të autobusave mund të kemi mall të kontrabanduar, Policia ka reaguar dhe kemi kuptu se aty ka produkte medicionale për të cilët nuk dihej origjina.
Sot kemi thirr doganën dhe agjensinë e Kosovës për produkte medicinale, ndërsa në ndërkohë kemi kuptu se kjo depo mund të kishte produkte medicinale brenda e që menaxhohen nga Spitali rajonal i Mitrovica Veri.
Tani së bashku me personelin e spitalit jemi në proces të verifikimit të kësaj depoje”, tha Elshani për Reporteri.net.
Mediumi lokal Kossev ka publikuar edhe pamje nga vendi ku janë gjetur produktet farmaceutike.
