Një valë paniku është përhapur së fundmi në rrjetet sociale pas thashethemeve se kukulla e famshme Annabelle, e njohur nga filmat horror dhe hetimet paranormale të familjes Warren, është zhdukur nga Muzeu Okult në Connecticut, SHBA. Por zyrtarët kanë ndërhyrë për të shuar spekulimet: Annabelle është e sigurt dhe nuk është zhdukur.
Zërat nisën të përhapen pas një ndalese të turneut “Devils on the Run”, organizuar nga Shoqëria e Anglisë së Re për Kërkime Psikike (NESPR), në qytetin New Orleans, ku disa vizitorë pohuan se nuk e panë kukullën në vitrinën e saj.
Kjo ndezi menjëherë rrjetin me teori konspirative se kukulla kishte dalë nga mbështjellësi i saj dhe kishte “ikur” – një ide që për shumë tingëllon e frikshme, duke njohur historinë e errët të objektit.
Por përfaqësuesit e NESPR kanë mohuar kategorikisht gjithçka. Në një video në TikTok më 24 maj, hetuesi Dan Rivera deklaroi: “Annabelle nuk është zhdukur. Ajo nuk ka qenë kurrë e zhdukur. Ndodhet e siguruar në vendin e saj në Muzeun Okult të Warrens.”
Për të shuar çdo dyshim, NESPR publikoi edhe një mesazh në Facebook: “Është vetëm një thashethem… Annabelle NUK është vjedhur. Kukulla është e sigurt në vendin e saj.”
Megjithatë, fansat e misterit do të kenë rastin ta shohin vetë kukullën në tetor, kur ajo pritet të ekspozohet në Ekspozitën Esoterik Rock Island Roadhouse 2025 në Illinois.
Një kukull me histori të frikshme
E njohur për sjelljet e saj të pashpjegueshme, historia e Annabelle-s filloi në vitet ’70, kur një infermiere e re në Hartford, Connecticut e mori atë si dhuratë. Sipas Warren-ëve, kukulla lëvizte vetë, linte mesazhe dhe madje dyshohet se sulmoi një person. Pasi hetuan, Ed dhe Lorraine Warren deklaruan se ajo manipulohej nga një entitet demonik, jo nga shpirti i një fëmije, siç besohej fillimisht.
Pas një bekimi fetar, kukulla u zhvendos në Muzeun Okult të Warrens, ku ruhej në një kuti të veçantë druri të mbrojtur. Muzeu u mbyll për publikun në vitin 2018, por Annabelle vazhdon të mbetet një prej objekteve më të famshme të botës paranormale.
