Ministri për Europën dhe Punët e Jashtme i Shqipërisë, Igli Hasani, ka njoftuar se katër shtetas shqiptarë janë evakuuar me sukses nga territori izraelit, në kuadër të përpjekjeve të vazhdueshme të shtetit shqiptar për të ndihmuar qytetarët e tij në zonat e konfliktit.
Përmes një postimi në rrjetin social Facebook, Hasani ka bërë të ditur se dy nga qytetarët shqiptarë janë larguar përmes Jordanisë dhe dy të tjerë përmes Egjiptit, pasi ndodheshin në Izrael për arsye profesionale dhe familjare.
“4 qytetarë të tjerë shqiptarë janë evakuuar me sukses nga Izraeli – dy përmes Jordanisë dhe dy përmes Egjiptit – të cilët gjendeshin atje për arsye profesionale dhe familjare. Falënderojmë autoritetet Izraelite, Jordaneze, Egjiptiane dhe Ambasadën Austriake në Tel Aviv për koordinimin e ngushtë me ambasadat shqiptare në Tel Aviv dhe Kajro. Vijojmë të ndjekim me përparësi çdo rast të qytetarëve shqiptarë të prekur, të cilët kërkojnë asistencë nga institucionet tona,” ka shkruar ministri.
Ky operacion evakuimi vjen në një kohë tensioni të lartë në rajon, ku shumë vende janë duke nxjerrë shtetasit e tyre nga Izraeli për shkak të rreziqeve të sigurisë.
