Reperi Kanye West, i cili tani njihet me emrin Ye ka sulmuar fëmijët binjakë të ish-mentorit të tij, reperit Jay-Z dhe gruas së tij, Beyonce, duke përdorur gjuhë fyese, ka raportuar Entertainment Weekly.
Ai iu referua fëmijëve Rumi dhe Sir me një term fyes, në postimin që më vonë e fshiu.
“Prit, a i ka parë ndonjëherë dikush fëmijët më të vegjël të Jay-Z dhe Beyonces. Jo, seriozisht, dhe kjo është arsyeja pse inseminimi artificial është bekim?”, ka shkruar ai në X.
Pak orë pasi e fshiu postimin, ai e postoi sërish.
“Nëse Twitter (X) ma heq këtë postim, ashtu qoftë, por dua që ta dini se Jay-Z apo kushdo tjetër nuk ka fuqi mbi mua”, ka shkruar West.
Pas ripostimit West kishte theksuar se nuk e bëri këtë për të qenë “person i mirë”.
“Dua që të gjithë ta dinë se e hoqa postimin për familjen e Jay-Z dhe Beyoncé … sepse ekzistonte mundësia që llogaria ime në Twitter të mbyllej”, ka shkruar ai.
Më pas, 47 vjeçi, ka pranuar se ndihej keq pas sulmit ndaj fëmijëve të çiftit.
“E dua Jay-Z dhe më vjen keq. Gjithmonë jam ndier si ‘dele e zezë’, sikur kam kërkuar një familje në këtë dreq muzike”, ka shkruar West.
Page Six ka shkruar gjithashtu se Tina Knowles, nëna e Beyonces, ka zgjedhur të ruajë qëndrimin e saj të matur pasi West sulmoi nipërit e saj.
“Është e vështirë të mbetesh pozitive dhe me klas përballë injorancës dhe së keqes. Por e di që asnjë armë e krijuar kundër meje apo familjes time nuk do të ketë sukses”, ka shkruar Knowles, 71 vjeçe, në një postim në llogarinë e saj ne rrjetin social Instagram.
West dhe Jay-Z kanë histori të gjatë bashkëpunimi, që nga viti 2000 kur West prodhoi këngë për kompaninë “Roc-A-Fella Records”, bashkëthemeluar nga Jay-Z.
Në vitin 2007, West publikoi këngën “Big Brother” si një dedikim për miqësinë e tyre.
Megjithatë, marrëdhëniet mes tyre u përkeqësuan pasi Jay-Z dhe Beyonce munguan në dasmën Westit me Kardashianin në vitin 2014.
Në vitin 2016, West i sulmoi publikisht gjatë një koncerti, ndërsa dy vjet më vonë ka pranuar se ishte “i lënduar” nga mungesa e tyre në ceremoni.
