Një incident i pazakontë ka tronditur kështjellën Windsor në Britaninë e Madhe, ku dy persona kanë arritur të kalonin portën e sigurisë dhe të kryenin një vjedhje në territorin e mbretëror. Lajmi i ngjarjes ka dalë vetëm tani, pas dy javësh dhe ka ndodhur më 13 tetor, gjatë natës, kur princi dhe princesha e Uellsit, William dhe Kate, ishin në shtëpinë e tyre dhe po flinin, bashkë me fëmijët e tyre.
Sipas raportimeve të “Independent”, dy burra dyshohet se janë ngjitur në një gardh të lartë për të hyrë në territorin mbretëror dhe më pas kanë përdorur një kamion të vjedhur për të thyer portën e oborrit të kështjellës. Pas futjes në pronë, ata kanë vjedhur disa automjete dhe pajisje nga një fermë që ndodhet brenda kompleksit.
Burimet e policisë kanë zbuluar se dy të dyshuarit janë larguar me një kamionçinë të zezë Isuzu dhe një biçikletë me katër rrota, të cilat ishin ruajtur në një hambar pranë. Pas vjedhjes, ata janë drejtuar në drejtim të zonës së vjetër Windsor dhe Datchet, ndërsa hetimet vazhdojnë ende.
Porta e shkatërruar e oborrit mbretëror ndodhet vetëm disa minuta larg vilës ku banojnë princi William dhe princesha Kate dhe është një nga hyrjet më të përdorura nga familja mbretërore. Mbreti Charles nuk ishte në rezidencën e tij në atë moment, ndërsa William dhe Kate, së bashku me fëmijët, besohet të kenë qëndruar në vilën e tyre private, Adelaide Cottage.
