Ndërsa Arabia Saudite përgatitet për Haxhin 2025, Ministria e Brendshme të martën paralajmëroi se ata që nuk arrijnë të largohen nga Mbretëria pas skadimit të vizave përballen me ndëshkime të rënda.
Ministria njoftoi se ata mund të përballen me gjoba deri në rreth 13,000 dollarë, burgim deri në gjashtë muaj dhe dëbim, njoftoi Agjencia Saudite e Shtypit, shkruajnë mediat e huaja.
Në këtë drejtim, Qeveria e Arabisë Saudite u ka bërë thirrje qytetarëve dhe banorëve që të sigurojnë që mysafirët e tyre që kanë mbërritur për vizitë ose vizat e Umres të respektojnë rregulloret.
“Vizat e të gjitha llojeve – me përjashtim të vizës së Haxhit – nuk i japin të drejtë mbajtësit të tyre për të kryer pelegrinazhin e Haxhit”, deklaroi ministria në mediat sociale.
Në fillim të këtij muaji, ministria paralajmëroi gjithashtu kompanitë dhe institucionet e Haxhit dhe Umres që t’u përmbahen ligjeve dhe rregulloreve të vendit.
Ndërkohë, data përfundimtare e hyrjes në Arabinë Saudite për mbajtësit e vizave të Umres ishte 13 prilli dhe të gjithë haxhilerët e Umres duhet të largohen nga vendi deri më 29 prill.
Pas kësaj date, edhe dhënia e lejeve të Umres do të pezullohet deri më 10 qershor 2025.
Kështu, hyrja dhe qëndrimi në Mekë do të kufizohen vetëm për ata që kanë viza haxhi, duke përjashtuar të gjitha llojet e tjera të vizave.
Andaj, kompanitë e shërbimit të Haxhit dhe Umres që nuk raportojnë pelegrinët që shkelin vizat e tyre mund të pësojnë gjoba deri në rreth 26,000 dollarë, të cilat mund të shumëfishohen në varësi të numrit të shkeljeve.
Haxhi është një pelegrinazh i përvitshëm islam në Mekë dhe kërkohet një herë në jetë për të gjithë myslimanët që janë të aftë fizikisht dhe financiarisht.
