Bruno Revolt dhe Bes Kallaku kanë ndezur pritshmëritë e publikut me publikimin e trailerit të këngës së tyre më të re, “Manushaqe”. Ky bashkëpunim pritet të lansohet nesër në orën 17:00, shoqëruar edhe me një videoklip të veçantë.
Me pamjet e para të ndara në rrjetet sociale, artistët kanë ngjallur interes të madh, duke lënë të kuptohet se projekti do të sjellë një energji të re dhe ritme që i përshaten atmosferës festive të fundvitit.
Për Bruno Revolt, ky vit ka qenë mjaft i suksesshëm. Ai ka realizuar disa bashkëpunime të spikatura, duke kulmuar me projekte të përfolura si bashkëpunimi me Albërë Hadergjonajn, me Ponin dhe hitin “Do Pi” në bashkëpunim me Luiz Ejllin, Lumi B dhe Naldin. “Manushaqe” duket se do të jetë një vulë e fuqishme për mbylljen e suksesshme të vitit.
Bes Kallaku, në anën tjetër, vazhdon të dallohet si një nga artistët më të dashur të publikut shqiptar, jo vetëm si aktor dhe humorist, por edhe si muzikant. Ky bashkëpunim me Bruno Revolt shënon një moment të veçantë në karrierën e tij muzikore.
