Bitcoin ka rënë nën 100,000 dollarë për herë të parë në gjashtë ditë pasi presidenti i SHBA-së, Donald Trump nënshkroi një urdhër ekzekutiv për të vendosur tarifa importi për mallrat nga Kina, Kanadaja dhe Meksika.
Tarifat e vendosura tashmë kanë shkaktuar “hakmarrje” nga të tre vendet, dhe industria e kriptove është e ndarë se si kjo do të ndikojë në tregun më të gjerë, shkruajnë mediat e huaja, përcjell Telegrafi.
Sipas një deklarate të 1 shkurtit nga Shtëpia e Bardhë, “Trump po zbaton një tarifë shtesë prej 25% për importet nga Kanadaja dhe Meksika dhe një tarifë shtesë prej 10% për importet nga Kina. Burimet energjetike nga Kanadaja do të kenë një tarifë më të ulët prej 10%”.
Në deklaratë thuhej se “Trump po ndërmerr veprime të guximshme për të mbajtur Meksikën, Kanadanë dhe Kinën përgjegjëse ndaj premtimeve të tyre për ndalimin e imigracionit të paligjshëm dhe ndalimin e fentanilit helmues dhe drogave të tjera që të rrjedhin në vendin tonë”.
