Mbrëmë, policia në Ferizaj arrestoi dy persona të dyshuar për deklarim të rremë, lidhur me një ngjarje të raportuar si sulm me thikë. Sipas raportit, një shtetase e huaj, 21-vjeçare, banore e Ferizajt, po trajtohej në Qendrën Emergjente pas një incidenti ku pretendonte se ishte sulmuar nga një person i panjohur në rrugën “Tahir Sinani”. Në dëshminë fillestare, edhe bashkëshorti i saj, 29-vjeçar, deklaroi se sulmi ishte kryer nga një person tjetër. Rasti u cilësua fillimisht si “Lëndim i lehtë trupor”.
Gjatë hetimeve, policia nuk gjeti gjurmë që përputheshin me raportin fillestar. Pasi vizituan banesën e çiftit, hetuesit zbuluan gjurmë gjaku dhe mjete të mprehta, duke ngritur dyshime për një përleshje të brendshme. Në përballjen me provat, bashkëshorti pranoi se çifti e kishte inskenuar ngjarjen dhe kishte dhënë deklarata të rreme.
Pas marrjes së trajtimit mjekësor, të dyshuarit u shoqëruan në stacionin policor, dhe rasti u rikualifikua në “Lëndim i lehtë trupor”, “Dhunë në familje”, dhe “Deklarim i rremë”. Me vendim të prokurorit, të dyshuarit u ndaluan në mbajtje për 48 orë për procedura të mëtejshme hetimore.
