Ministria e Punëve të Jashtme të Kosovës ka reaguar pas lajmit se dy kosovarë janë arrestuar në Serbi. MPJ ka kërkuar nga Qeveria e Serbisë detaje relevante përfshirë identitetin e personave të arrestuar dhe ku janë duke u mbajtur.
“Në lidhje me këtë rast, Zyra Ndërlidhëse e Republikës së Kosovës në Serbi i ka dërguar tashmë Qeverisë së Serbisë, përmes Zyrës Ndërlidhëse të Serbisë në Kosovë, një kërkesë formale për ta konfirmuar rastin, si dhe për të ofruar detajet tjera relevante, përfshirë identitetin e personave të arrestuar dhe lokacionin ku ata janë duke u mbajtur”, ka thënë zyra për media e MPJD’së për Insajderin.
Ministrja ka thënë se ka njoftuar edhe Delegacioni i Bashkimit Evropian në Serbi dhe misionet diplomatike të vendeve të Kuint-it të akredituara në Beograd.
Bëhet e ditur se, diplomatët e Zyrës Ndërlidhëse të Republikës së Kosovës në Serbi do të bëjnë kërkesë zyrtare për vizitën e tyre në qendrën e paraburgimit ku janë duke u mbajtur.
Familjarët e dy të rinjve, Rexhep Hoti dhe Gyven Azemi kanë konfirmuar se ata janë arrestuar në territorin serb gjatë kohës sa po prenin dru.
Ata thanë se autoritetet serbe e kanë caktuar masën e ndalimit prej 30 ditësh.
