12 minatorë të Treçës janë lënduar nga acidi.
Për pasojë, disa prej tyre kanë pësuar lëndime më serioze dhe aktualisht po trajtohen në Spitalin e Mitrovicës.
Lajmin e ka konfirmuar për Nacionalen edhe kryetari i Sindikatës së Punëtorëve të Trepçës, Ibrahim Januzi.
Dyshohet që një cisternë ka shpërthyer, dhe minatorët kanë rënë në kontakt me të.
Kurse, Destan Kërleshi nga Sindikata e Minatorëve të Trepçës ka theksuar se minatorët janë lënduar gjatë transportimit me ashensor të acidit sulfurik.
Spitali i Përgjithshëm i Mitrovicës në një komunikatë për media ka bërë të ditur se disa prej minatorëve, kanë lëndime më të rënda.
“Sot, rreth orës 13:00, ka ndodhur një incident në Minierën e Trepçës, ku ka pasur rrjedhje kimike të acidit sulfurik ku për pasojë janë lënduar 12minatorë”, thuhet në komunikatë.
“Prej tyre, 2 kanë pasur lëndime serioze të syve (djegie kimike me acid sulfurik), të cilët pas trajtimit në Repartin e Emergjencës janë transferuar ne repartin e Oftalmologjisë së Spitalit të Mitrovicës për trajtim të mëtejmë”, thuhet më tutje.
“Ndërsa, 10 prej tyre janë duke u trajtuar në repartin e Emergjencës, të cilët janë jashtë rrezikut pë jetë dhe pas trajtimeve pritet të lëshohen në shtëpi”, përfundon komunikata.
Nuk dihet ende se si ka ardhur deri te rrjedhja e acidit.
Kohë më parë minatorët e Trepçës patën mbajtur greva për kushtet e punës. Megjithatë, më vonë kishin arritur një marrëveshje me ministrinë dhe greva ishte ndalur.
Grevistët për 10 ditë kishin qëndruar në minierë, duke kërkuar që kërkesat e tyre të plotësohen.
Minatorët që ishin në grevë kanë kërkuar përmirësim të kushteve të punës, paga të rregullta, sigurime shëndetësore dhe largimin e kryeshefit të ndërmarrjes.
Për gjatë këtyre ditëve, shumë grevistë kanë kërkuar ndihmë mjekësore për shkak të përkeqësimit të gjendjes shëndetësore.
Pagat e minatorëve në Trepçë sillen nga 700 deri në 900 euro, varësisht përvojës dhe përgatitjes profesionale.
Kompleksi metalurgjik Trepça është shoqëri aksionare: 80 për qind e aksioneve janë të Qeverisë se Kosovës, 20 për qind janë të punonjësve të kësaj ndërmarrjeje.
