Familja e këngëtarit Labinot Rexha ka reaguar publikisht pas zhvillimeve të fundit në shtëpinë e Big Brother VIP Kosova, duke shprehur shqetësim për trajtimin që, sipas tyre, ai ka përjetuar brenda lojës.
Përmes një deklarate të publikuar në llogarinë zyrtare të artistit në Facebook, familjarët kanë dënuar përplasjet verbale dhe situatat që i kanë cilësuar si presion psikologjik të vazhdueshëm ndaj Rexhës.
Në reagim theksohet se ofendimet dhe fyerjet e drejtuara ndaj tij kanë tejkaluar kufijtë e një gare televizive, duke prekur dimensionin personal dhe etik. Ata përmendin si shqetësuese një situatë të fundit, ku këngëtari është zgjuar nga gjumi në mënyrë provokuese nga një banore, duke e konsideruar veprimin të papranueshëm.
Familja kërkon ndërhyrje të menjëhershme nga stafi dhe produksioni për të garantuar sigurinë dhe mirëqenien e tij. Në të kundërtën, paralajmërojnë se mund të tërheqin Rexhën nga gara për të mbrojtur integritetin e tij fizik dhe mendor.
Po ashtu, ata bëjnë të ditur se po shqyrtojnë mundësinë e ndërmarrjes së hapave ligjorë ndaj deklaratave, fyerjeve apo kërcënimeve publike që lidhen me situatën.
Në fund të reagimit, familja thekson se do të vazhdojë ta mbështesë këngëtarin me qetësi dhe respekt ndaj publikut, duke nënvizuar se loja duhet të mbetet një garë me dinjitet dhe frymë sportive.
Ky reagim vjen pas episodeve të tensionuara në shtëpi, të cilat kanë nxitur debat të gjerë në rrjetet sociale dhe reagime të shumta nga fansat.
